Хаах
ᠮᠣᠩᠭᠤᠯ ᠤᠯᠤᠰ ᠠ᠋ᠴᠠ ᠣ᠂ ᠬᠤ᠂ ᠤ᠂ ᠤ᠋ᠨ ᠡᠷᢈᠡᠦ ᠬᠣᠲᠠ ᠳ᠋ᠤ ᠰᠠᠭᠤᠭᠠ ᠶᠡᠷᠦᠩᢈᠡᠢ ᠻᠣᠨ᠋ᠰᠦ᠋ᠯ ᠤ᠋ᠨ ᠭᠠᠵᠠᠷ ᠒᠐᠒᠕ ᠣᠨ ᠤ᠋ ᠐᠕ ᠳ᠋ᠤᠭᠠᠷ ᠰᠠᠷᠠ ᠶ᠋ᠢᠨ ᠐᠔ ᠦ᠋ ᠡᠳᠦᠷ «ᠦᠨᠳᠦᠰᠦᠨ ᠦ᠋ ᠪᠢᠴᠢᢉ ᠦᠰᠦᢉ ᠦ᠋ᠨ ᠪᠠᠶᠠᠷ» ᠤ᠋ᠨ ᠡᠳᠦᠷ ᠢ᠋ ᠲᠡᠮᠳᠡᢉᠯᠡᠨ ᠥᠩᢉᠡᠷᠡᢉᠦᠯᠦᠯᠡ᠃ «ᠦᠨᠳᠦᠰᠦᠨ ᠦ᠋ ᠪᠢᠴᠢᢉ ᠦᠰᠦᢉ ᠦ᠋ᠨ ᠪᠠᠶᠠᠷ» ᠢ᠋ ᠡᠨᠡ ᠵᠢᠯ ᠒᠒ ᠳ᠋ᠠᢈᠢ ᠤᠳᠠᠭᠠ ᠪᠠᠨ ᠲᠡᠮᠳᠡᢉᠯᠡᠵᠦ ᠪᠤᠢ ᠪᠥᢉᠡᠳ ᠲᠤᠰ ᠠᠷᠭᠠ ᢈᠡᠮᠵᠢᠶᠡᠨ ᠳ᠋ᠦ ᠶᠡᠷᠦᠩᢈᠡᠢ ᠻᠣᠨ᠋ᠰᠦ᠋ᠯ ᠤ᠋ᠨ ᠭᠠᠵᠠᠷ ᠤ᠋ᠨ ᠬᠠᠷᠢᠭᠤᠴᠠᠭᠰᠠᠨ ᠪᠦᠰᠡ ᠶ᠋ᠢᠨ ᠶᠡᢈᠡ᠂ ᠳᠡᢉᠡᠳᠦ ᠰᠤᠷᠭᠠᠭᠤᠯᠢ ᠨᠤᠭᠤᠳ ᠲᠤ ᠰᠤᠷᠴᠤ ᠪᠤᠢ ᠮᠣᠩᠭᠣᠯ᠂ ᠪᠤᠷᠢᠶᠠᠳ ᠣᠶᠤᠲᠠᠨ ᠨᠤᠭᠤᠳ ᠪᠣᠯᠤᠨ ᠮᠣᠩᠭᠣᠯ ᠤ᠋ᠨ ᠰᠣᠶᠤᠯ᠂ ᠪᠢᠴᠢᢉ ᠦᠰᠦᢉ ᠢ᠋ ᠰᠣᠨᠢᠷᠬᠠᠭᠴᠢ ᠣᠷᠤᠰ ᠤ᠋ᠨ ᠢᠷᢉᠡᠳ ᠥᠷᢉᠡᠨ ᠢ᠋ᠶᠡᠷ ᠣᠷᠤᠯᠴᠠᠵᠡᠢ᠃
ᠠᠷᠭᠠ ᢈᠡᠮᠵᠢᠶᠡᠨ ᠦ᠋ ᢈᠦᠷᠢᠶᠡᠨ ᠳ᠋ᠦ «ᠦᠨᠳᠦᠰᠦᠨ ᠦ᠋ ᠪᠢᠴᠢᢉ — ᠥᠪ ᠰᠣᠶᠤᠯ» ᠰᠡᠳᠦᠪ ᠢ᠋ᠶᠡᠷ ᠮᠡᠳᠡᠯᢉᠡ ᠴᠢᠳᠠᠪᠤᠷᠢ᠂ ᠤᠷᠠ ᠤᠬᠠᠭᠠᠨ ᠢ᠋ ᠰᠣᠷᠢᠭᠰᠠᠨ ᠭᠤᠷᠪᠠᠨ ᠲᠥᠷᠦᠯ ᠦ᠋ᠨ ᠤᠷᠤᠯᠳᠤᠭᠠᠨ ᠵᠣᢈᠢᠶᠠᠨ ᠪᠠᠶᠢᠭᠤᠯᠤᠭᠳᠠᠵᠤ᠂ ᠶᠡᠷᠦᠩᢈᠡᠢ ᠻᠣᠨ᠋ᠰᠦ᠋ᠯ ᠪ᠂ ᠶᠢᠤᠡᠴᠢᠨᠬᠣᠷᠯᠤ ᠱᠠᠩᠨᠠᠯ ᠢ᠋ ᠭᠠᠷᠳᠠᠭᠤᠯᠪᠠ᠃
ᠮᠣᠩᠭᠤᠯ ᠤᠯᠤᠰ ᠤ᠋ᠨ ᠪᠣᠯᠪᠠᠰᠤᠷᠠᠯ ᠤ᠋ᠨ ᠶᠠᠮᠤᠨ ᠠ᠋ᠴᠠ «ᠦᠨᠳᠦᠰᠦᠨ ᠦ᠋ ᠪᠢᠴᠢᢉ ᠰᠣᠶᠤᠯ ᠢ᠋ ᠳᠡᠯᢉᠡᠷᠡᢉᠦᠯᠦᢉᠴᠢ» ᠴᠣᠯᠠ ᠲᠡᠮᠳᠡᢉ ᠢ᠋ ᠣᠷᠤᠰ᠂ ᠪᠤᠷᠢᠶᠠᠳ ᠢᠷᢉᠡᠳ ᠲᠦ ᠦᠨᠳᠦᠰᠦᠨ ᠦ᠋ ᠮᠣᠩᠭᠣᠯ ᠪᠢᠴᠢᢉ ᠢ᠋ ᠵᠢᠭᠠᠵᠤ᠂ ᠲᠠᠨᠢᠭᠤᠯᠬᠤ ᠳ᠋ᠤ ᠒᠐ ᠭᠠᠷᠤᠢ ᠵᠢᠯ ᠦ᠋ᠨ ᢈᠥᠳᠡᠯᠮᠦᠷᠢ ᠪᠡᠨ ᠵᠣᠷᠢᠭᠤᠯᠤᠭᠰᠠᠨ ᢈᠦᠮᠦᠰ ᠲᠦ ᠣᠯᠭᠤᠵᠡᠢ᠃
ᠡᠳᠡᢉᠡᠷ ᢈᠦᠮᠦᠰ ᠦ᠋ᠨ ᠨᠢᢉᠡ ᠨᠢ ᠡᠷᢈᠡᠦ ᠮᠤᠵᠢ ᠶ᠋ᠢᠨ ᠪᠤᠷᠢᠶᠠᠳ ᠤ᠋ᠨ ᠰᠣᠶᠤᠯ ᠤ᠋ᠨ ᠲᠥᠪ ᠦ᠋ᠨ ᠳᠡᠷᢉᠡᠳᠡᢈᠢ «ᠬᠠᠷᠢᠶᠠᠴᠠᠢ» ᠳᠤᠭᠤᠶᠢᠯᠠᠩ ᠢ᠋ ᠒᠐᠑᠘ ᠣᠨ ᠠ᠋ᠴᠠ ᢈᠢᠴᠢᠶᠡᠯᠯᠡᢉᠦᠯᠵᠦ ᠡᢈᠢᠯᠡᢉᠰᠡᠨ ᠵᠠᠭᠳᠠᠶᠧᠸᠠ ᠯᠶᠦᠪᠣᠪ ᠪᠠᠷᠠᠰᠣᠸᠨᠠ ᠶᠤᠮ᠃ ᠲᠡᠷᠡ ᠪᠡᠷ ᠲᠤᠰ ᠳᠤᠭᠤᠶᠢᠯᠠᠩ ᠢ᠋ᠶᠠᠷ ᠓᠐᠐ ᠣᠷᠴᠢᠮ ᠰᠤᠷᠤᠭᠴᠢ᠂ ᠣᠶᠤᠲᠠᠨ᠂ ᠰᠣᠨᠢᠷᠬᠠᠭᠴᠢᠳ ᠳᠤ ᠦᠨᠳᠦᠰᠦᠨ ᠦ᠋ ᠮᠣᠩᠭᠣᠯ ᠪᠢᠴᠢᢉ ᠪᠣᠯᠤᠨ ᠪᠢᠴᠢᢉ ᠦ᠋ᠨ ᢈᠢᠴᠢᠶᠡᠯ ᠵᠢᠭᠠᠵᠤ᠂ ᠰᠣᠶᠤᠯ ᠢ᠋ ᠲᠦᢉᠡᢉᠡᢈᠦ ᠳ᠋ᠦ ᠦᠨᠡ ᠲᠡᠢ ᠬᠤᠪᠢ ᠨᠡᠮᠡᠷᠢ ᠣᠷᠤᠭᠤᠯᠵᠡᠢ᠃ ᠮᠥᠨ ᠪᠢᠴᠢᢉ ᠦᠰᠦᢉ ᠦ᠋ᠨ ᠪᠠᠶᠠᠷ ᠤ᠋ᠨ ᠦᠢᠯᠡ ᠠᠵᠢᠯᠯᠠᠭᠠᠨ ᠳ᠋ᠤ ᠢᠳᠡᠪᢈᠢ ᠰᠠᠨᠠᠭᠠᠴᠢᠯᠠᠭᠠᠲᠠᠢ ᠣᠷᠤᠯᠴᠠᠵᠤ᠂ ᠠᠮᠵᠢᠯᠲᠠ ᠪᠠᠷ ᠢ᠋ᠶᠠᠨ ᠲᠡᠷᠢᢉᠦᠯᠡᢉᠰᠡᠨ ᠯᠤᠪᠰᠠᠨᠣᠸᠠ ᠷᠢᠨᠴᠢᠩᠬᠠᠩᠳᠤ᠂ ᠭᠠᠯᠲᠠᠨᠴᠡᠴᠡᢉ ᠨᠠᠷ ᠲᠤ ᠲᠤᠰ ᠱᠠᠩᠨᠠᠯ ᠢ᠋ ᠮᠥᠨ ᠭᠠᠷᠳᠠᠭᠤᠯᠤᠭᠰᠠᠨ ᠪᠠᠶᠢᠨᠠ᠃