Хаах
ᠪᠣᠯᠪᠠᠰᠤᠷᠠᠯ ᠤ᠋ᠨ ᠰᠠᠶᠢᠳ ᠫᠦ᠂ ᠨᠠᠷᠠᠨᠪᠠᠶᠠᠷ ᠮᠠᠲ᠋ᠧᠮᠠᠲ᠋ᠢᠭ ᠤ᠋ᠨ ᠣᠯᠢᠮᠫᠢᠶᠠᠳ᠋ ᠢ᠋ ᠮᠣᠩᠭᠣᠯ ᠳ᠋ᠤ ᠠᠩᠬᠠ ᠤᠳᠠᠭᠠ ᠵᠣᢈᠢᠶᠠᠨ ᠪᠠᠶᠢᠭᠤᠯᠵᠤ ᠪᠠᠶᠢᠭᠰᠠᠨ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠭᠠᠪᠢᠶᠠᠲᠤ ᠪᠠᠭᠰᠢ᠂ ᠮᠤ᠂ ᠤ᠂ ᠪᠤ᠂ ᠶᠡ᠂ ᠰᠤ᠂ ᠢ᠋ᠢᠨ ᢈᠦᠨᠳᠦᠲᠦ ᠫᠷᠣᠹᠧᠰᠰᠣᠷ᠂ ᠳ᠋ᠣᠻᠲ᠋ᠣᠷ ᠭ᠂ ᠵᠠᠭᠳᠠᠷᠠᠭᠴᠠ ᠶ᠋ᠢ ᢈᠦᠯᠢᠶᠡᠨ ᠠᠪᠴᠤ ᠠᠭᠤᠯᠵᠠᠯᠠ᠃
ᠡᠳᠦᢉᠡ ᠙᠒ ᠨᠠᠰᠤ ᠶ᠋ᠢ ᠵᠣᠭᠤᠭᠯᠠᠵᠤ ᠪᠤᠢ ᠴᠤ ᠮᠠᠲ᠋ᠧᠮᠠᠲ᠋ᠢᠭ ᠤ᠋ᠨ ᠣᠯᠢᠮᠫᠢᠶᠠᠳ᠋ ᠤ᠋ᠨ ᠢ᠋ᠶᠠᠨ ᠲᠤᠬᠠᠢ ᠣᠨ᠂ ᠰᠠᠷ ᠠ᠋ ᠲᠠᠢ ᠨᠢ ᠶᠠᠷᠢᠬᠤ ᠲᠡᠷᠡ ᠪᠡᠷ ᠑᠙᠕᠙ ᠣᠨ ᠳ᠋ᠤ ᠣᠯᠠᠨ ᠤᠯᠤᠰ ᠤ᠋ᠨ ᠮᠠᠲ᠋ᠧᠮᠠᠲ᠋ᠢᠭ ᠤ᠋ᠨ ᠣᠯᠢᠮᠫᠢᠶᠠᠳ᠋ /ᠣ᠂ ᠤ᠂ ᠮᠠ᠂ ᠤ᠂/ ᠠᠩᠬᠠ ᠷᠦᠮᠢᠨ ᠳ᠋ᠤ ᠪᠣᠯᠬᠤ ᠳ᠋ᠤ ᠠᠵᠢᠭᠯᠠᠭᠴᠢ ᠪᠠᠷ ᠣᠷᠤᠯᠴᠠᠵᠤ᠂ ᠑᠙᠖᠔ ᠣᠨ ᠳ᠋ᠤ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠢ᠋ᠶᠠᠨ ᠲᠥᠯᠦᢉᠡᠯᠡᠯ ᠢ᠋ ᠣᠷᠤᠯᠴᠠᠭᠤᠯᠵᠤ ᠶᠠᠪᠤᠵᠡᠢ᠃ ᠤᠯᠠᠮ ᠢ᠋ᠶᠠᠷ ᠑᠙᠖᠕ ᠣᠨ ᠳ᠋ᠤ ᠮᠣᠩᠭᠣᠯ ᠤ᠋ᠨ ᠮᠠᠲ᠋ᠧᠮᠠᠲ᠋ᠢᠭ ᠤ᠋ᠨ ᠣᠯᠢᠮᠫᠢᠶᠠᠳ᠋ ᠢ᠋ ᠠᠩᠬᠠ ᠵᠣᢈᠢᠶᠠᠨ ᠪᠠᠶᠢᠭᠤᠯᠵᠤ᠂ ᠥᠩᢉᠡᠷᠡᢉᠰᠡᠨ ᠖᠐ ᠵᠢᠯ ᠦ᠋ᠨ ᠬᠤᠭᠤᠴᠠᠭᠠᠨ ᠳ᠋ᠤ ᠣ᠂ ᠤ᠂ ᠮᠠ᠂ ᠤ᠂ ᠤ᠋ᠨ ᠨᠠᠢᠮᠠᠨ ᠠᠯᠲᠠᠨ ᠮᠧᠳᠠᠯᠲᠠᠨ ᠲᠠᠢ ᠪᠣᠯᠤᠭᠰᠠᠨ ᠪᠠᠶᠢᠨᠠ᠃
ᠲᠡᠷᠡ ᠪᠡᠷ «ᠮᠠᠲ᠋ᠧᠮᠠᠲ᠋ᠢᠭ ᠤ᠋ᠨ ᠴᠠᠭᠠᠨ ᠲᠣᠯᠤᠭᠠᠢ»᠂ «ᠮᠠᠲ᠋ᠧᠮᠠᠲ᠋ᠢᠭ ᠤ᠋ᠨ ᠮᠡᠳᠡᠯᢉᠡ᠂ ᠴᠢᠳᠠᠪᠤᠷᠢ ᠶ᠋ᠢᠨ ᠲᠦᠪᠰᠢᠨ ᠰᠢᠯᠭᠠᠬᠤ ᠰᠡᠳᠦᠪ ᠦ᠋ᠳ»᠂ «ᢉᠧᠣᠮᠧᠲ᠋ᠷ ᠦ᠋ᠨ ᠪᠠᠲᠤᠯᠠᠬᠤ ᠪᠠ ᠪᠠᠶᠢᠭᠤᠯᠬᠤ ᠪᠣᠳᠤᠯᠭᠠ ᠨᠤᠭᠤᠳ»᠂ «ᠮᠠᠲ᠋ᠧᠮᠠᠲ᠋ᠢᠭ ᠤ᠋ᠨ ᠵᠢᠱᠢᢉ ᠳᠠᠭᠠᠭᠠᠯᠭᠠᠪᠤᠷᠢ» ᠵᠡᠷᢉᠡ ᠰᠤᠷᠬᠤ ᠪᠢᠴᠢᢉ ᠢ᠋ ᠵᠣᢈᠢᠶᠠᠨ ᠭᠠᠷᠭᠠᠭᠰᠠᠨ ᠨᠢ ᢈᠡᠦᢈᠡᠳ ᠦ᠋ᠳ ᠪᠠᠭᠠ ᠠ᠋ᠴᠠ ᠪᠠᠨ ᠮᠠᠲ᠋ᠧᠮᠠᠲ᠋ᠢᠭ ᠲᠤ ᠳᠤᠷᠠᠯᠠᠬᠤ ᠳ᠋ᠤ ᠶᠡᢈᠡᢉᠡᢈᠡᠨ ᠬᠤᠪᠢ ᠨᠡᠮᠡᠷᠢ ᠣᠷᠤᠭᠤᠯᠤᠭᠰᠠᠨ ᢉᠡᠳᠡᢉ ᠢ᠋ ᠪᠣᠯᠪᠠᠰᠤᠷᠠᠯ ᠤ᠋ᠨ ᠰᠠᠶᠢᠳ ᠫᠦ᠂ ᠨᠠᠷᠠᠨᠪᠠᠶᠠᠷ ᠣᠨᠴᠠᠯᠠᠨ ᢈᠡᠯᠡᠵᠦ᠂ ᠲᠠᠯᠠᠷᠬᠠᠯ ᠢᠯᠡᠷᢈᠡᠶᠢᠯᠡᠪᠡ᠃
