ᠳ᠋ᠢᠽᠢᠲ᠋ᠠᠯ ᢈᠡᠯᠪᠡᠷᠢ ᠳ᠋ᠦ ᠰᠢᠯᠵᠢᢉᠦᠯᠦᢉᠰᠡᠨ ᠰᠤᠷᠬᠤ ᠪᠢᠴᠢᢉ ᠦ᠋ᠳ ᠢ᠋ ᢈᠦᠯᠢᠶᠡᠨ ᠠᠪᠤᠯ᠎ᠠ

ᠪᠠᠭ᠎ᠠ ᠠᠩᢉᠢ ᠶ᠋ᠢᠨ ᠰᠤᠷᠤᠭᠴᠢᠳ ᠤ᠋ᠨ ᠴᠦᠩᢈᠦᠨ ᠦ᠋ ᠵᠢᠩ ᠢ᠋ ᠪᠠᠭᠠᠰᠬᠠᠵᠤ᠂ ᠳᠠᠰᠬᠠᠯ᠂ ᠳᠠᠭᠠᠭᠠᠯᠭᠠᠪᠤᠷᠢ ᠨᠤᠭᠤᠳ ᠢ᠋ ᠢᠯᠡᢉᠦᠦ ᠰᠣᠨᠢᠷᠬᠠᠯᠲᠠᠢ᠂ ᠢᠨ᠋ᠲ᠋ᠧᠷᠠᠻᠲ᠋ᠢᠸ᠂ ᠪᠦᠲᠦᢉᠡᠯᠴᠢ ᠪᠣᠯᠭᠠᠬᠤ ᠵᠣᠷᠢᠯᠭ᠎ᠠ ᠪᠠᠷ ᠪᠣᠯᠪᠠᠰᠤᠷᠠᠯ ᠤ᠋ᠨ ᠶᠠᠮᠤᠨ ᠫᠣᠯᠢᠱ ᠤ᠋ᠨ “Learnetic” ᠻᠣᠮᠫᠠᠨᠢ ᠶ᠋ᠢᠨ ᠲᠧᢈᠨᠢᢉ ᠦ᠋ᠨ ᠳᠡᠮᠵᠢᠯᢉᠡ ᠲᠡᠢ ᠪᠡᠷ I᠆V ᠠᠩᢉᠢ ᠶ᠋ᠢᠨ ᠶᠢᠰᠦᠨ ᠲᠥᠷᠦᠯ ᠦ᠋ᠨ ᠓᠓ ᠰᠤᠷᠬᠤ ᠪᠢᠴᠢᢉ ᠢ᠋ ᠳ᠋ᠢᠽᠢᠲ᠋ᠠᠯ ᢈᠡᠯᠪᠡᠷᠢ ᠳ᠋ᠦ ᠰᠢᠯᠵᠢᢉᠦᠯᠦᠯ᠎ᠡ᠃

ᠻᠣᠸᠢᠳ᠋ ᠑᠙ ᠴᠠᠷ ᠲᠠᠬᠤᠯ ᠤ᠋ᠨ ᠨᠥᠯᠦᢉᠡ ᠪᠡᠷ ᠪᠣᠯᠪᠠᠰᠤᠷᠠᠯ ᠤ᠋ᠨ ᠰᠠᠯᠪᠤᠷᠢ ᠳ᠋ᠤ ᠴᠠᢈᠢᠮ ᠰᠢᠯᠵᠢᠯᠲᠡ ᠡᠷᠴᠢᠮᠵᠢᠵᠦ᠂ ᠪᠦᢈᠦ ᠨᠠᠰᠤᠨ ᠤ᠋ ᢈᠦᠮᠦᠰ ᠵᠠᠢ ᠠ᠋ᠴᠠ ᠰᠤᠷᠤᠯᠴᠠᠬᠤ ᠪᠣᠯᠤᠮᠵᠢ ᠪᠠᠷ ᠬᠠᠩᠭᠠᠬᠤ ᠶ᠋ᠢᠨ ᠲᠤᠯᠠᠳᠠ ᠰᠤᠷᠭᠠᠭᠤᠯᠢ ᠨᠤᠭᠤᠳ ᠵᠢᠭᠠᠬᠤ᠂ ᠰᠤᠷᠬᠤ ᠦᠶᠢᠯᠡ ᠶᠠᠪᠤᠴᠠ ᠶ᠋ᠢ ᠳᠠᢈᠢᠨ ᠵᠠᠭᠪᠤᠷᠴᠢᠯᠠᠵᠤ ᠡᢈᠢᠯᠡᢉᠰᠡᠨ᠃ ᠡᢉᠦᠨ ᠲᠡᠢ ᠵᠡᠷᢉᠡᠴᠡᠨ ᢈᠦᠮᠦᠰ XXI ᠵᠠᠭᠤᠨ ᠤ᠋ ᠪᠣᠯᠪᠠᠰᠤᠷᠠᠯ᠂ ᠲᠡᢉᠦᠨ ᠢ᠋ ᠣᠯᠭᠤᠬᠤ᠂ ᠣᠯᠵᠤ ᠠᠪᠬᠤ ᠲᠤᠬᠠᠢ ᠠᠰᠠᠭᠤᠳᠠᠯ ᠢ᠋ ᠰᠢᠨ᠎ᠡ ᠥᠨᠴᠦᢉ ᠢ᠋ᠶᠡᠷ ᠬᠠᠷᠠᠬᠤ ᠪᠣᠯᠤᠭᠰᠠᠨ ᠶᠤᠮ᠃

ᠮᠠᠨ ᠤ᠋ ᠤᠯᠤᠰ ᠡᠨᠡ ᠴᠢᢉᠯᠡᠯ ᠳ᠋ᠦ ᠣᠨᠴᠤᠭᠤᠢ ᠠᠩᠬᠠᠷᠤᠯ ᠬᠠᠨᠳᠤᠭᠤᠯᠵᠤ᠂ ᠨᠢ‍᠂ ᠦ‍᠂ ᠪᠠ‍᠂ ᠶ᠋ᠢᠨ «ᠬᠤᠪᠢᠰᠴᠤ ᠪᠤᠢ ᠪᠣᠯᠪᠠᠰᠤᠷᠠᠯ» ᠳᠡᢉᠡᠳᠦ ᢈᠡᠮᠵᠢᠶᠡᠨ ᠦ᠋ ᠴᠢᠭᠤᠯᠭ᠎ᠠ ᠠᠭᠤᠯᠵᠠᠯᠲᠠ ᠶ᠋ᠢᠨ ᢈᠦᠷᠢᠶᠡᠨ ᠳ᠋ᠦ «ᠳ᠋ᠢᠽᠢᠲ᠋ᠠᠯ ᠰᠤᠷᠤᠯᠴᠠᠬᠤᠢ ᠪᠠ ᠬᠤᠪᠢᠷᠠᠭᠠᠨ ᠥᢉᠡᠷᠡᠴᠢᠯᠡᠯᠲᠡ» ᠰᠡᠳᠦᠪ ᠢ᠋ᠶᠡᠷ ᠲᠤᠰᠬᠠᠶᠢᠯᠠᠭᠰᠠᠨ ᢈᠡᠯᠡᠯᠴᠡᢉᠦᠯᢉᠡ ᠵᠣᢈᠢᠶᠠᠨ ᠪᠠᠶᠢᠭᠤᠯᠵᠤ᠂ ᠡᠨᠡ ᠴᠢᢉᠯᠡᠯ ᠳ᠋ᠦ ᢈᠡᠷᠡᢉᠵᠢᢉᠦᠯᢈᠦ ᠡᢉᠦᠷᢉᠡ᠂ ᠠᠮᠠᠯᠠᠯᠲᠠ ᠪᠠᠨ ᠲᠠᠨᠢᠯᠴᠠᠭᠤᠯᠤᠭᠰᠠᠨ ᠪᠢᠯᠡ᠃ ᠡᠨᠡ ᢈᠦᠷᠢᠶᠡᠨ ᠳ᠋ᠦ www᠃sur᠃esis᠃edu᠃mn ᠰᠢᠰᠲ᠋ᠧᠮ ᠢ᠋ ᢈᠥᢉᠵᠢᢉᠦᠯᠵᠦ᠂ ᠳ᠋ᠢᠽᠢᠲ᠋ᠠᠯ ᠰᠤᠷᠬᠤ ᠪᠢᠴᠢᢉ ᠦ᠋ᠳ ᠢ᠋ ᢈᠦᠯᠢᠶᠡᠨ ᠠᠪᠤᠯ᠎ᠠ᠃ ᠡᢉᠦᠨ ᠦ᠋ ᠦᠷ᠎ᠡ ᠳ᠋ᠦᠩ ᠳ᠋ᠦ:

• ᠪᠠᠭ᠎ᠠ ᠠᠩᢉᠢ ᠶ᠋ᠢᠨ ᠓᠓ ᠰᠤᠷᠬᠤ ᠪᠢᠴᠢᢉ ᠦ᠋ᠨ ᠠᠭᠤᠯᠭ᠎ᠠ᠂ ᠳᠠᠰᠬᠠᠯ᠂ ᠳᠠᠭᠠᠭᠠᠯᠭᠠᠪᠤᠷᠢ ᠶ᠋ᠢ ᠢᠨ᠋ᠲ᠋ᠧᠷᠠᠻᠲ᠋ᠢᠸ ᢈᠡᠯᠪᠡᠷᠢ ᠳ᠋ᠦ ᢈᠥᠷᠪᠡᢉᠦᠯᠵᠦ᠂ ᠑᠓᠂᠕᠐᠐ ᠣᠷᠴᠢᠮ ᠳᠠᠰᠬᠠᠯ᠂ ᠳᠠᠭᠠᠭᠠᠯᠭᠠᠪᠤᠷᠢ ᠶ᠋ᠢᠨ ᠰᠠᠩ;
• ᠰᠤᠷᠭᠠᠯᠲᠠ ᠶ᠋ᠢᠨ ᢈᠥᠲᠦᠯᠪᠦᠷᠢ ᠶ᠋ᠢᠨ ᢈᠡᠷᠡᢉᠵᠢᠯᠲᠡ᠂ ᠰᠤᠷᠤᠯᠴᠠᠬᠤᠢ ᠶ᠋ᠢᠨ ᠶᠠᠪᠤᠴᠠ᠂ ᠦᠷ᠎ᠡ ᠳ᠋ᠦᠩ ᠲᠡᠢ ᠬᠣᠯᠪᠤᠭ᠎ᠠ ᠲᠠᠢ ᠮᠡᠳᠡᢉᠡᠯᠡᠯ ᠢ᠋ ᠴᠠᢈᠢᠮ ᠲᠧᠻᠨᠤᠯᠤᢉᠢ ᠠᠰᠢᠭᠯᠠᠨ ᠪᠣᠭᠤᠨᠢ ᠬᠤᠭᠤᠴᠠᠭᠠᠨ ᠳ᠋ᠤ ᠴᠤᠭᠯᠠᠭᠤᠯᠬᠤ᠂ ᠪᠠᠭᠰᠢ ᠶ᠋ᠢᠨ ᠠᠵᠢᠯ ᠤ᠋ᠨ ᠠᠴᠢᠶᠠᠯᠠᠯ ᠢ᠋ ᠪᠠᠭᠤᠷᠠᠭᠤᠯᠬᠤ᠂ ᠠᠷᠭ᠎ᠠ ᠵᠦᠢ ᠪᠡᠨ ᠲᠥᠯᠦᠪᠯᠡᢈᠦ ᠳ᠋ᠦ ᠳᠡᠮᠵᠢᠯᢉᠡ ᠦᠵᠡᢉᠦᠯᢈᠦ ᠴᠣᠭᠴᠠ ᠴᠠᢈᠢᠮ ᠰᠢᠰᠲ᠋ᠧᠮ;
• ᠪᠣᠯᠪᠠᠰᠤᠷᠠᠯ ᠤ᠋ᠨ ᠮᠡᠷᢉᠡᠵᠢᠯ ᠦ᠋ᠨ ᠪᠠᠶᠢᠭᠤᠯᠤᠯᠭ᠎ᠠ ᠶ᠋ᠢᠨ ᠬᠣᠯᠪᠤᠭᠳᠠᠬᠤ ᢈᠦᠮᠦᠨ ᠦ᠋ ᠨᠥᢉᠡᠴᠡ᠂ ᠶᠡᠷᠦᠩᢈᠡᠢ ᠪᠣᠯᠪᠠᠰᠤᠷᠠᠯ ᠤ᠋ᠨ ᠰᠤᠷᠭᠠᠭᠤᠯᠢ ᠶ᠋ᠢᠨ ᠪᠠᠭᠰᠢ ᠨᠠᠷ ᠴᠠᢈᠢᠮ ᠠᠷᠭ᠎ᠠ ᢈᠡᠷᠡᢉᠰᠡᠯ᠂ ᠮᠣᠳᠦᠯᠢ ᠠᠰᠢᠭᠯᠠᠨ ᠢᠨ᠋ᠲ᠋ᠧᠷᠠᠻᠲ᠋ᠢᠸ ᠳᠠᠰᠬᠠᠯ᠂ ᠳᠠᠭᠠᠭᠠᠯᠭᠠᠪᠤᠷᠢ ᠪᠣᠯᠪᠠᠰᠤᠷᠠᠭᠤᠯᠬᠤ ᠫᠷᠤᠭᠷᠠᠮ;
• ᢈᠢᠴᠢᠶᠡᠯ ᠦ᠋ᠨ ᠬᠤᠪᠢᠶᠠᠷᠢ᠂ ᠰᠤᠷᠤᠭᠴᠢᠳ ᠤ᠋ᠨ ᠢᠷᠡᠴᠡ᠂ ᠢᠨ᠋ᠲ᠋ᠧᠷᠠᠻᠲ᠋ᠢᠸ ᠰᠤᠷᠬᠤ ᠪᠢᠴᠢᢉ ᠦ᠋ᠨ ᠳᠠᠰᠬᠠᠯ᠂ ᠳᠠᠭᠠᠭᠠᠯᠭᠠᠪᠤᠷᠢ ᠶ᠋ᠢᠨ ᢉᠦᠶᠢᠴᠡᠳᢈᠡᠯ᠂ ᠴᠠᢈᠢᠮ ᠰᠤᠷᠬᠤ ᠪᠢᠴᠢᢉ ᠦ᠋ᠨ ᠠᠰᠢᠭᠯᠠᠯᠲᠠ ᠲᠠᠢ ᠬᠣᠯᠪᠤᠭᠠᠲᠠᠢ ᠶᠡᢈᠡ ᠥᢉᢉᠦᢉᠳᠡᠯ ᠢ᠋ ᠰᠤᠷᠤᠭᠴᠢ᠂ ᠠᠩᢉᠢ᠂ ᠪᠦᠯᠦᢉ᠂ ᠰᠤᠷᠭᠠᠭᠤᠯᠢ᠂ ᠳᠡᢉᠦᠷᢉᠡ᠂ ᠠᠶᠢᠮᠠᠭ᠂ ᠦᠨᠳᠦᠰᠦᠨ ᠦ᠋ ᠲᠦᠪᠰᠢᠨ ᠳ᠋ᠦ ᠡᢉᠦᠰᢈᠡᢈᠦ᠂ ᠳ᠋ᠦᠩ ᠰᠢᠨᠵᠢᠯᠡᢉᠡ ᢈᠢᢈᠦ᠂ ᢈᠢᠨᠠᠬᠤ ᠪᠣᠯᠤᠮᠵᠢ;
• ᠰᠤᠷᠬᠤ ᠪᠢᠴᠢᢉ ᠢ᠋ ᠢᠨ᠋ᠲ᠋ᠧᠷᠠᠻᠲ᠋ᠢᠸ ᢈᠡᠯᠪᠡᠷᠢ ᠳ᠋ᠦ ᢈᠥᠷᠪᠡᢉᠦᠯᢈᠦ᠂ ᠳᠠᠰᠬᠠᠯ ᠳᠠᠭᠠᠭᠠᠯᠭᠠᠪᠤᠷᠢ ᠶ᠋ᠢ ᢈᠥᢉᠵᠢᢉᠦᠯᢈᠦ᠂ ᠰᠢᠨ᠎ᠡ ᠪᠡᠷ ᠵᠣᢈᠢᠶᠠᠬᠤ ᠲᠤᠰᠬᠠᠶᠢᠯᠠᠭᠰᠠᠨ ᠪᠠᠭᠠᠵᠢ᠂ ᢈᠡᠷᠡᢉᠰᠡᠯ ᠲᠡᠢ ᠴᠠᢈᠢᠮ ᠰᠢᠰᠲ᠋ᠧᠮ ᠢ᠋ ᠪᠤᠢ ᠪᠣᠯᠭᠠᠪᠠ᠃